Հոգեկան տրավման, հոգետրավման կամ հոգեցնցումը, սուր, հարատև սթրեսի կամ շրջապատի ինտենսիվ անբարենպաստ ազդեցությունների արդյունքում, մարդու հոգեկան առողջությանը հասցված վնասն է։

Հոգեկան տրավման, կախված իր բնույթից, կարող է պատճառ հանդիսանալ մի շարք այնպիսի հոգեկան և վարքային խանգարումների, ինչպիսիք են դիսոցիատիվ խանգարումներն ու հետտրավմատիկ սթրեսային խանգարումը։ Հոգեկան տրավմայի արդյունքում կարող են դիտարկվել դեպրեսիա, վախեր, տագնապայնություն, գերգրգռվածություն, հիշողության վատթարացում։ Այն կարող է ախտահարել մարդու հուզական ոլորտը, օրգանիզմի հարմարվողական գործառույթները, միջանձնային հարաբերությունները և մասնագիտական գործունեությունը։ Հոգեկան տրավման լինում է տարբեր տեսակի՝ սուր և քրոնիկ, հանկարծակի կամ աստիճանաբար քայքայող։ Հոգետրավմայի արդյունքում տուժում է հուզակամային դաշտը, իջնում է ինքնագնահատականը, խախտվում է պաշտպանվածության զգացումը, խաթարվում է կենսագործունեությունն ու հաղորդակցումը։ Հոգեկան տրավմայի հետևանքներն են նաև սոցիալական մեկուսացումը և տրավմայի բովանդակության հետ առնչվող ազդակների (թրիգերներ) նկատմամբ բացասական հակազդումները։

Ժամանակակից հոգեկան առողջության ոլորտում հոգեկան տրավման հաղթահարելու համար կան բազմաթիվ մեթոդներ, սակայն Համաձայն Առողջապահության համաշխարհային կազմակերպության, Ամերիկյան հոգեբանական ասոցիացիայի, Ամերիկյան հոգեբուժական ասոցիացիայի և Տրավմատիկ սթրեսի ուսումնասիրությունների միջազգային ընկերակցության  ԱՇԴՎ-ն, կոգնիտիվ-վարքաբանական թերապիային զուգահեռ, համարվում է առաջին ընտրության հոգեթերապևտիկ մեթոդ (First Choice Therapy) հոգետրավմայով և սթրեսով պայմանավորված խանգարումների համար։